الاتصالات او الوطنيه

تحديث الثلاثاء الساعه 12 ظهرا
وصلتني رسالتين عبر الايميل بخصوص هذا الموضوع
لا اعرف المرسل ولكن اكيد من احد الشركتين
وما ادري شنو الهدف من الرسايل .. هل هو تهديد او غير ذلك
مع العلم اني مامدحت احد على حساب احد
قلت كلام الحق وقلت عيوب ومميزات الجميع
مدحت الشركتين وذميت الشركتين
فياترى منو من الشركتين اللي مايتقبل النقد ويحاول يطور من نفسه

---------------------------------------------------

نسمعك .... والله ماتسمعون أحد .. ماتسمعون غير صوت الفلوس

تمتع بخدمات الوطنيه المميزه ... شنو علاقة البنتين

مرة أخرى بما اننا ننتظر الاستجواب وغالبية النواب لايعتمد عليهم
ممكن اليوم معاك وباجر مع الوزير حسب الصفقات المقدمه
وياخوفي اذا صارت الصجيه وصار طرح ثقه تصير زحمه على الحمامات

المهم اليوم نقدم هالموضوع الخفيف أيضا
منو أفضل الإتصالات المتنقله أو الوطنيه
هذا موضوع شفته في اكثر من موقع ومنتدى
في ناس بتقول الوطنيه وفي ناس بتقول الاتصالات

قالوا: طلقها واخذ اختها ... قال : الله يلعن الثنتين
وإحنا غصب موطيب مجبورين بوحده من الثنتين
والله يستر من الثالثه ولاتصير ألعن من الثنتين

أنا خطي النقال من شركة الاتصالات بنظام الفواتير وعن طريق عقود الوزارات
وبصراحه مرتاح من هالنظام نظام فواتير مخفض وتجوال بدون تأمين
ولكن المهم تدفع اول كل شهر علشان ماتنقطع الخدمه

لكن ابي اقول لكم قصتي مع اشتراك الانترنت عن طريق الشركتين الاتصالات والوطنيه
اول اشتراك سويته كان بالاتصالات بمبلغ 9.5 شهري والاشتراك مفتوح
وبعد فتره من اشتراكي صار سيئ للغايه وبنفس الوقت اشوف اللي عندهم اشتراك الوطنيه كان ممتاز
وألغيت اشتراكي بالاتصالات ورحت الوطنيه أخذت اشتراك من عندهم ب10 دنانير ومفتوح
وطبعا لازم معاه خط واشتراك الخط 2.5 بالشهر يعني يصير المجموع 12.5 بالشهر
وبعد فتره صار سيئ والاتصالات أفضل رحت صكيت اشتراكي بالوطنيه ورحت الاتصالات
ولقيت الاشتراك عندهم مو مفتوح وعلى 3 شرائح وبنفس الوقت الوطنيه نزلت اشتراك الادج ب14 دينار
وكان افضل من الاتصالات وأخذته وكان شغال عدل وخصوصا لما اروح الوفره كان الداونلود موطبيعي
وكان بالوفره أفضل من داخل الديره
وكلمت الدعم الفني وقلت لهم بالوفره احسن ليش
قال هناك مافي ضغط مشتركين ومافيه مباني كثيره
قلت يعني اروح اسكن هناك طول السنه حتى بالصيف
الحر ممكن نتحمله الله يخلي التكييف ولكن ذبان الوفره منو يتحمله
واذا انقطعت الكهرباء بمناسبة القطع المبرمج شنو اسوي ماعندك شي قريب تنحاش له
ولكن هالسنه صار مايشبك بالوفره وبنفس المكان الا اذا صعدت فوق السطح يشبك
سبحان مغير الأحوال
وطبعا خدمة العملاء عند الوطنيه تعبانه ومايفهمون شي بس يسجلون شكوى
واذا اتصلت مره ثانيه يقولك الموظف مافيه شكوى
واذا قلت لهم عطوني رقم الشكوى يقولك طويل مانقدر نعطيك ياه
وبعدين قررت آخذ إشتراك الاتصالات ب16 دينار وكان أفضل واحلى من إشتراك الوطنيه
رحت الاتصالات واخذته وبصراحه كان حلووووووو كنت مبسوط ومرتاح
ولكن
ولكن
في يوم من الأيام وكان في أوائل شهر 3 اللي طاف رحت أدفع الفواتير فواتير الموبايل والانترنت
وصدمت من الموظف لما قال عليك المبلغ الفلاني قلت ليش قال موبايل كذا واشتراك الانترنت 189 دينار
قلت شنوووووووووووووووووووو قال ايه انت تجاوزت الحد المسموح 5 غيغا
شلون الحسبه هذي ؟؟ طلع الموظفين كلهم مايعرفون السالفه ولايعرفون الحسبه
رحت للشركه الرئيسيه ونفشتهم وقلت حتى لو المبلغ هذا صحيح المفروض تبلغوني اني تجاوزت او خلصت المسموح
المهم كانوا في موقف محرج ومضحك وقالوا فعلا الخطأ خطأنا وراح نشيل المبلغ منك
والموظف اللي بقسم الماليه قال تصدق عندنا زباين عليهم مبالغ خياليه6000 و 8000 دينار
قلت شلون تحسبونها ؟؟ حسبها لي بالتفصيل ... طلع 1 غيغا يساوي 104 دنانير تقريبا
يعني 5 غيغا ب16 دينارو1 غيغا اضافي 104 دنانير شي مضحك
المهم طاح المبلغ وصكيت اشتراكي مع النصابين عفوا الاتصالات
ولكن بو طبيع مايخلي طبعه رحت الوطنيه واخذ اقوي اشتراك ب28 دينار
قط فلوسك بالشمس واقعد بالظلوالله انه افضل من الدي اس البس الله لايغير علينا

بعد ما صكيت اشتراكي بالاتصالات سمعت ان الشركه اهتزت لووووول مصدق عمري
ويطرشون واسطات لي علشان ارد لهم ولكن مشكلتي مخي اذا قفل قفل .. قلت لو تعطوني اشتراك بدون فلوس ما ارجع لكم
المهم بعد ماشافوا الهروب الجماعي منهم ومن اشتراكهم الخايس
أعادوا النظر بموضوع حسبتهموصار ال1 غيغا الإضافي ب2 دينارجذي معقول
شعليكم يا مشتركي الاتصالات وبالأخص الإيغو شفتوا شلون مواقف الرجال تنفع
لو الناس قبلت بكلامهم وماناطحتهم ما غيروا حسبتهم
ناس ماتجي الا بالعين الحمرا